Duket absurd vendimi i qeverisë për të dhënë liri-dalje për pensionistët edhe këtë fundjavë.
Edhe pse kishin të drejtën për të dalë deri në 10:00 të paraditës së sotme, të moshuarit dhe prindërit me fëmijë nuk kanë mundur të shijojnë disa momente në natyrë në parkun më të madh të kryeqytetit, tek liqeni artificial i cili qëndron ende mbyllur me urdhër qeverie.
Mësohet se policia bashkiake ka rrethuar parkun e Liqenit Artificial duke mos lënë askënd të shijojë momente në natyrë.
Burimet nga “BalkanËeb” bëjnë me dije se në orët e para të mëngjesit është bllokuar vetëm pjesa ku ndodhet palestra, ndërsa më pas në mesditë është rrethuar i gjithë parku dhe nuk është lejuar askush të shëtitë.
Të pyetur për vendimin e rrethimit të zonës me shirita sikur të ishte një skenë krimi policët bashkiakë kanë deklaruar se kanë marrë urdhër por pa dhënë shpjegime të mëtejshme.
Kujtojmë se ministria e shëndetësisë publikoi dje udhëzimin e plotë për këtë fundjavë, lidhur me lëvizjen e njerëzve dhe mjeteve, si dhe për hapjen e aktiviteteve dhe bizneseve.
Në urdhrin e firmosur këtë mbrëmje, MSH bën me dije se edhe kjo fundjavë do të jetë e mbyllur në qytetet për pjesën më të madhe të aktiviteteve ekonomike, ku do të lejohen vetëm dyqanet ushqimore dhe farmacitë, gjatë ditës së shtunë, deri në orën 21:00, ndërsa e diela do të jetë në izolim të plotë.