Dhe ja ku del Vilma, prapë. Si gjithmonë do ketë diçka të majme dhe për kompanitë që janë të lidhura me të. E me sa duket rradha i ka rënë Agjensisë Kombëtare të Turizmit që të “kollitet” dhe të nxjerrë nga buxheti rreth 111 milionë lekë të vjetra për promocion.
Sipas tenderit me numër reference REF-27016- 06-18-2019 të publikuar zyrtarisht ditën e djeshme, këto para do t’i jepen bashkimit të operatorëve ekonomikë “Inpress” sh.p.k & “Interlogistic” sh.p.k për “Materiale promocionale”. Njëra prej këtyre kompanive, përkatësisht “Interlogistic” sh.p.k ka administrator dhe pronar të vetëm Edmond HIdo-n, bashkëshortin e Majlinda Hido-s e cila është edhe motra e Vilma Nushit.
Me sa duket veç koncensionit prej rreth 120 milion eurosh të check-up-it, Vilma Nushi dhe kompanitë që kanë lidhje më të, vazhdojnë të gllabërojnë thela të tjera të mëdha nga “torta publike”. Interesante është edhe mënyra e zhvillimit të këtij tenderi.
Nga dokumentacionet publike shikohet se kanë marrë pjesë në të ashtuquajturën garë, plot 5 kompani apo bashkime kompanish, nga të cilat njëra ka dhënë vlerë zero, dy kanë dhënë thuajse shifër identike me njëra-tjetrën por pak më të lartë se firma fituese, ndërsa vetëm një firmë ka ofruar gati 72 milionë lekë të vjetra ose rreth 65% të vlerës së ofruar nga kompania e motrës së Vilma Nushit.
E megjithatë, ndonëse kjo kompani ka ofruar një vlerë shumë më të ulët e me diferencë shumë të madhe krahasuar me firmën që fitoi, ajo është skualifikuar. Një ndër motivet më qesharake të skualifikimit është se kjo kompani nuk kishte dorëzuar një dokument që vërteton se mjediset ku ushtron aktivitetin janë të pajisura me kamera.
Ndërkohë nga ana tjetër kompania e motrës së Vilma Nushit rezulton se ka kapital vetëm 100,000 lekë të reja. Ka lezet, apo jo?