Seria A është bërë gati për rifillimin e kampionatit, ndërsa duket se edhe ekipet po pastrohen totalisht nga rastet e COVID-19. Klubi Milanit ka raportuar se nuk ka asnjë futbollist apo pjestar tjetër të infektuar, ndërsa së fundmi ka dalë përgjigjia për Zlatan Ibrahimovic.
Sulmuesi suedez mbërriti pak ditë më pare në Itali, pasi kishte kaluar thuajse dy muaj gjatë pandemisë në vendlindjen e tij. Ai duhej t’i nënshtrohej karantinës së detyrueshme para se të mund të lihej i lirë që të bënte stërvitje individuale.
Për të anashkaluar qëndrimin në shtëpi për dy javë, klubi gjeti një zgjidhje. Ai kërkoi që sulmuesit t’i bëheshin tamponët, duke iu nënshtruar dy të ndryshmëve brenda pak ditësh, siç kërkon procedura. Në të dy rastet, Ibrahimoviç ka rezultuar negativ e kështu ka qenë i lirë që të dalë nga karantina e të jetë në dispozicion të stafit teknik.
Ndërkohë, lajme pozitive vijnë edhe nga klubi i Sampdorias. Në një njoftim të bërë gjatë ditës së sotme, u informuan tifozët se të katër lojtarët që kishin rezultuar pozitivë në testet e pak ditëve më parë, tashmë kishsin rezultuar negativë që do të thotë se kanë kaluar pa probleme virusin e rrezikshëm e shumë shpejt mund të dalin në stërvitje.
