Shefja e Epidemiologjisë në ISHP, Eugena Tomini ka folur në lidhje me situatën e krijuar në vendin tonë prej Covid-19. Sipas saj piku në Shqipëri mund të arrihet në javën e tretë të prillit.
Ajo ka thënë më tej:
Trendi linear është në vijimësi dhe pritet që në javët në vijim të kemi të njëjtën trend, me një pikë në javën e tretë të prillit, por gjithsesi është gjithçka për t'u parë. Janë duke u vlerësuar skedat epidemiologjike të atyre që kanë shenja dhe ata pa simptoma, është situatë e pritshme për një pandemi. Kemi një popullatë të re, dhe kjo shtresë është prekur edhe në mënyra asimptomatike.
Doktoreshë, Eugena Tomini ka thënë edhe do të ketë rikthim të infeksioneve respiratore edhe gjatë vjeshtës. Por sipas saj shqiptarët nuk do të kalojnë as një verë normale dhe se nuk do të jetë si vitet e tjera.
Më pas ka shtuar:
Ky është një vit i vështirë, nuk do ketë një verë normale, do kemi ndryshim të sjelljes pas këtij distancimi social. Nuk besoj se do kemi një verë siç kemi përjetuar verat e tjetra. Mund të kemi një zbehje të virusit gjatë periudhës së nxehtë, por asgjë nuk është vërtetuar se virusi ka qarkulluar gjatë një periudhë pranverore, edhe pse të ftohtë. Shpresoj të kemi një verë më me liri individuale, por që prezenca e COVID do të na shoqërojë dhe që vjeshta do e rikthejë me infeksionet respiratore, derisa të kemi vaksinën sezonale.
Ndërkohë në vendin tonë vazhdojnë thirrjet për të qëndruar në shtëpi dhe për të respektuar higjenën dhe distancimin social.