Një ndër bashkitë e prekura nga tërmeti i 26 nëntorit është edhe Bashkia e Lezhës, ku shumë banesa apo pallate janë vlerësuar si të pabanueshme.
Edhe pse shumë banorë po flejnë nëpër çadra apo në ambiente të hapura, kjo nuk e ka ndaluar aspak kryebashkiakun e Lezhës, Pjerin Ndreu që të merret me gjëra të tjera, që ndoshta për momentin nuk janë më të rëndësishme se akomodimi i banorëve nëpër shtëpi të reja.
Ndreu është shprehur se Bashkia e Lezhës nuk i ka kapacitetet financiare për të ndërtuar të gjitha banesat me fondet e bashkisë dhe se po punon për të gjetur fonde në mënyra të ndryshme.
Ndërsa ankohet se Bashkia e Lezhës nuk ka fonde, tenderi i fundit i shpallur nga kjo bashki tregon krejt të kundërtën e asaj çfarë thotë Ndreu.
Pasi në tenderin me objekt “Ndricimi i Qytetit me Sistemin LED”, i bërë publik me 25 shkurt ka një fond limit prej 333 milionë lekësh.
Por ku i gjeti këto para tani Ndreu për të bërë këto punime? Kush është më i rëndësishëm në këto momente ndriçimi i qytetit apo jeta e banorëve? Mesa duket për Ndreun për momentin rëndësi ka ndriçimi i qytetit.
Një tjetër gjë që bie në sy është fakti se në specifikimet e tenderit thuhet se kërkohen dy lloj ndriçuesish LED dhe se totali për këto të dy është 852 ndriçues.
Por lind pyetja a kushtojnë kaq shumë para vetëm 852 ndriçues apo edhe Ndreu ka filluar metodën e famshme KÇK me tenderat?
Mbetet për t’u parë se kush do të jetë fituesi i këtij tenderi. JOQ ALBANIA