JOQ Albania
Home

Po transportonte armë luftarake, anija shqiptare sulmohet nga forcat libiane
Shkruar nga: V Gashi | Publikuar më: 18/02/2020 19:13

  • Share
  • Share
  • Share
  • Share

Një incident ka ndodhur pranë portit të Tripolit në Libi, ku ushtria vendase (LNA) sulmoi një anije turke, e cila dyshohet se po transportonte armë.

Zyrtarët vendas nuk dhanë shumë detaje në lidhje me dërgesën e pretenduar të armëve në port, e cila mendohet se do të shërbente për betejën mbi kontrollin e Tripolit.

Fraksioni i Ushtrisë Kombëtare të Libisë (LNA), me qendër në lindje, i cili udhëhiqet nga Khalifa Haftar, nisi një fushatë në prill të vitit të kaluar për të marrë nën kontroll Tripolin, në të cilin ndodhet edhe qeveria e njohur ndërkombëtarisht, e mbështetur edhe nga Turqia.

Reuters raporton se forcat lindore të Libisë kanë hedhur katër raketa, ndërkohë nuk dihet nëse ka të lënduar.

Që nga janari, Turqia ka dërgua disa anija që transportonin armë dhe kamionë në Tripoli dhe Misrata, në mbështetje të qeverisë aktuale, e cila ka përplasje me forcat lindore të LNA-së.

LNA mbështetet nga Emiratet e Bashkuara Arabe, Egjipti, Jordania si dhe mercenarët rusë.

Ndërkohë lidhur me këtë lajm, burime për "Fax News" bëjnë me dije se anija e sulmuar i përket kompanisë shqiptare "Sh.Trans", ndërsa pjesë e ekuipazhit kanë qenë disa shtetas turq.

Të njëjtat burime konfirmojnë se anija ishte dhënë me qira në Turqi, ndërsa ekuipazhi i shqiptarëve ishte zëvendësuar me turq.

Ajo që mbetet mister është nëse është ndryshuar apo jo flamuri, pasi deri më tani mjeti lundrues nuk ka bërë ç'rregjistrim.

Sulmi së martës ndodhi teksa oficerët e forcave të Tripolit dhe LNA-së u përgatitën të takoheshin për një raund të dytë bisedimesh në Gjenevë, për të vendosur një armëpushim të pëhershëm mes tyre.

Megjithatë, mediat vendase raportojnë se deri më tani ende nuk është marrë një vendim, pasi sulmi i sotëm i ka tensionuar më tej marrëdhëniet.