Lleshi, Rama dhe Veliu frikësojnë të “fortët”: Do t’ua bëjmë atdheun ferr! Është çështje kohe, Nëse jo sot, nesër

Ditën e sotme gjatë një parade policeske, kryeministri Edi Rama, Ministri i Brendshëm Sandër Lleshi dhe Drejtori i Përgjithshëm i Policisë së Shtetit Ardi Veliu kanë prezantuar paketën Anti-KÇK, që pritet të godasë fort hajdutët e pulave (kriminelët) dhe t’ua bëjë këtyre të fundit atdheun ferr.

Të paktën kështu na ka qetësuar Rama në fjalën e tij të mbajtur para njësisë së re policore. Ai siguroi se qeveria është gati për një përballje ekstreme me këto kriminelë.

Rama u shpreh:

Duhet t’ua bëjmë të parehatshëm atdheun kriminelëve. Nuk mund të jetë platforma e ekspozimit të muskujve në club-e apo hapësira publike, duhet të jetë ferri i tyre.”

Të njëjtën gjë (duke ecur në gjurmët e shefit të shefit), deklaroi edhe Veliu:

Paratë do të shkojnë në favor të shtetit. Për përmbushjen e këtij prioriteti jemi të përgatitur për luftën me çdo lloj çmimi. Do ua bëjmë të parehatshëm atdheun kriminelëve.”

Por teksa Rama dhe Veliu u shprehën se do ua bëjnë Shqipërinë “ferr” të fortëve, Lleshi i frikësoi me një tjetër mesazh duke i paralajmëruar se është çështje kohe, por do përfundojnë keq kjo është e sigurt, sot ose nesër.

Ai tha me ton të prerë:

Është thjesht çështje kohe. Udhëtimi kriminal do të ndërpritet keq. Nëse jo sot, nesër.”

Gjithsesi këto paralajmërime janë mesazhe të koduara për "kriminelët e vërtetë" ndaj të cilëve hapen hetime dhe vihen në dispozicion të gjitha njësitë e Policisë së Shtetit. Për të gjithë hajdutët që kryejnë vepra të rënda penale të këtij lloji, duhet të behën gati pasi do të hetohen nga ana pasurore, nëse i kanë siguruar të ardhurat e majme nga vjedhja e më pas shitja e pulës së komshiut.

Kujdes, Shteti po ju vëzhgon!