U torturua për vdekje pasi u mor peng, flet kunati i Jak Prengës: Nuk kishte konflikte me asnjë, shteti të gjejë trupin

Policia konfirmoi sot se Jak Prenga i marrë peng disa ditë më parë në Kamëz, ka ndërruar jetë gjatë kohës që po transportohej për në resortin ku do të mbahej, i cili është në pronësi të vëllezërve Hajri që kryen dhe pengmarrjen e tij, tashmë të arrestuar.

49-vjeçari, si pasojë e goditjeve të marra gjatë rrëmbimit dhe humbjes së gjakut, ka ndërruar jetë gjatë rrugës për në resort, e më pas autorët kanë fshehur trupin.

Ndërkohë mësohet se po vijojnë kërkimet për gjetjen e trupit të Prengës, por deri më tani asgjë nuk dihet.

Së fundmi ka reaguar për herë të parë familja e viktimës.

Kunati i tij, Mark Suli, burri i motrës së viktimës, ka thënë se policia i njoftoi dje në mbrëmje se ai nuk jeton më.

Sipas tij, ai nuk ka pasur asnjë konflikt me askënd, teksa i bën thirrje shtetit që të gjejnë trupin

Për news24 ai u shpreh:

Policia na tthirri dje në mbrëmje e na tha se nuk jeton më. Nuk i njohim të arrestuarit, as ne as personi që është marrë peng, as ka pasur asnjë lloj llogarie me ta. Shteti të gjejë trupin sa më shpejt dhe ta sjellë atë në shtëpi. Autorët të vihen para drejtësisë”