Detaje të reja janë zbardhur nga pengmarrja e ndodhur mesditën e sotme në rrugën "London" të Kamzës.
Raportohet se konflikti mes disa personave që çoi në rrëmbimin me dhunë të njërit prej tyre, mund të ketë ndodhur për shkak të një makine.
Pas debatit me fjalë, ata e futën me forcë në makinë, duke u larguar në drejtim të Fushë-Krujës.
Abc News ka sjellë edhe pamje nga vendi ku ndodhi grabitja. Raportohet se makina e autorëve të dyshuar është lokalizuar në zonën e njohur si Ura e Gjoles.
Deri më tani, policia ka shoqëruar një dëshmitar nga vendi i ngjarjes.
Bëhet fjalë për një grua, e cila ka një parukeri përballë vendit ku ndodhi sherri.
Personi i rrëmbyer dhe autorët nuk kanë qenë nga zona ku ndodhi pengmarrja, pasi banorët nuk kanë njohur asnjë prej tyre.
Banorët kanë thënë se autorët së bashku me pengun janë larguar me një fuoristradë të bardhë, ndërkohë që skena është filmuar nga kamerat e sigurisë së një banese që ndodhet aty pranë.
Pamjet e kapura nga kamerat e sigurisë janë marrë nga grupi hetimor, për të zbuluar identitetin e autorëve dhe personit të rrëmbyer.
