Shkrimtari Agron Tufa nuk di të ndalet! Me postimet e tij të shpeshta në rrjete sociale, piketon zyrtarë të lartë, ku së fundmi bëhet fjalë për një ndër ata që kanë qenë pjesë e Sigurimit të Shtetit në kohën e komunizmit.
Ai ka bërë publik edhe një dokument, ku paralajmëron konkretisht Drejtorin e Kërkimeve Shkencore në Akademinë e Sigurisë, Xhavit Shalën.
Tufa i drejton disa pyetje që kanë nevojë për përgjigje, por më tej i bën edhe një paralajmërim: Kujdes me përgjigjet!
Më tutje, shkrimtari thekson se do t'i zbrazë pikë për pikë të gjitha të vërtetat e tmerrshme.
Mesazhi i Agron Tufës:
Postcriptum 1: nga “Punët dhe ditët” e ish oficerit të Sigurimit, shokut Xhavit Shala, sot Drejtor i lartë i Policisë së Shtetit dhe disa pyetje të karakterit mistik për shokun Xhavit: 1. Kë/cilët do të përgjonte punëtori i zellshëm operativ, shoku Xhavit, në zyrën e “pallatit përballë”? 2. “Zyra siguron kushte normale për ruajtjen e sekretit”. – Çfarë sekreti duhej të ruhej vallë? 3. Kush/cili nga punëtorët operativë e spiunonte tjetrin – Niko Subashi Xhavit Shalën apo Xhaviti Nikon? Ndoshta të dy ndësjelltësisht? Ndoshta asnjëri? 4. A i përdor ende punëtori i partishëm operativ i Sigurimit ish bp-të e tij nga Elbasani, për të shkruar e përhapur skenarë nëpër shtypin shqiptar kundër armiqve të Sigurimit dhe Rilindjes? Cilët janë pseudonimet e tyre? Shënim: Kujdes me përgjigjet! Partia të kap në flagrancë me zemër të pasinqertë! Dhe t’i zbraz pikë-pikë të vërtetat e tmerrshme. Të pashterrshme!