Një 40-vjeçar ka përfunduar në prangat e Policisë Kufitare, pasi u kap duke transportuar lëndë narkotike, të llojit marijuanë.
Bëhet fjalë për shtetasin Arsen Hoxha, i cili po kalonte në Qafë-Botë me një mjet tip "Mitsubish" me targa AA031VJ, teksa u pikas nga Policia e Sarandës.
Gjatë kontrolleve të kryera nga policia, në automjetin e Hoxhës u gjetën dhe sekuestruan 70 kg marijuanë, e cila dyshohet se kishte destinacion Greqinë.
40-vjeçari nga Cakrani i Fierit ndodhej në automjet së bashku me bashkëshorten e tij. Ai u arrestua menjëherë nga policia.
Hoxha nuk ishte një emër i panjohur për policinë, pasi ishte arrestuar në vitin 2004 për trafik klandestinësh në Sarandë.
Mjeti i tij po i nënshtrohet kontrollit të detajuar nga Policia Kufitare, ndërkohë detaje të reja pritet të bëhen publike në vijim.