Analisti i njohur, Fatos Lubonja ka komentuar sërish mbrëmjen e sotme krizën politikë në vend dhe jo vetëm. I ftuar në studion e emisionit “Real Story” në “News 24”, ai tha se ka një kontradiktë të madhe mes dy forcave politike.
Teksa fliste për situatën problematike në vend, analisti theksoi se interesi i PS është që të thotë se kriza u kapërcye. Nga ana tjetër, Lubonja tha se opozita po përdor dy gjuhë.
Sipas tij, në Shqipëri nuk ka parlament dhe të dyja palët e kanë fajin. 'Një mish mash, situata e pashpresë', përmbyll deklaratën e tij analisti.
Lubonja u shpreh:
Një kontradiktë e madhe vihet re mes dy forcave. Ervin Bushati thotë se ne jemi të kënaqur që u arrit marrëveshja. Kemi në krahun tjetër përfaqësuesin e PD zotin Bylykbashi që thotë se jemi në një krizë, edhe politike të thelluar. Atëherë më thoni ju mua se çfarë është kjo marrëveshje? Për mendimin tim, interesi i PS është që të thotë se kriza u kapërcye, Europa thotë kriza u kapërcye dhe do të hapim negociatat, për qëllime gjeo-politike e jo interesa të Shqipërisë. Tani halli i madh është tek opozita, që në njërën anë ndihmon në këtë kapërcim krize, nga ana tjetër kriza po thellohet tani o njëra o tjetra. Kjo tregon se opozita përdor dy gjuhë. Nëse do e bëjnë me ligj, atëherë duhet me parlament. Tani edhe brenda edhe jashtë, nuk shkon. Është qesharake që në Shqipëri nuk ka parlament dhe të dyja palët e kanë fajet. Është një mish mash. Situata është e pashpresë, por jo serioze e ka thënë Churchilli.