Kryeministri Rama vijoi ditën e sotme "show-n" e radhës me banorët e prekur nga tërmeti në Durrës, të cilët prej dy muajsh vijojnë të përballen jo vetëm me dramën që la pas tërmeti, por edhe me batutat pa shije në këto ditë të vështira për popullin shqiptar.
Në redaksinë e JOQ Albania ka mbërritur një video, e cila tregon takimin e Ramës jo nga kamera e ERTV, por nga një tjetër kënd. Ai gazetaresk, që i njeh planet më mirë se një montazhier për ta nxjerrë liderin suprem bukur në sytë e popullit.
Ajo që bie në sy në këtë video është edhe "ushtria" e kameramanëve dhe fotografëve personalë të Ramës, të cilët e ndjekin nga pas në çdo takim dhe event që kryerilindasi zhvillon. Çdo takim i Ramës, përveç daljeve publike për mediat, është ekskluzivitet i stafit të ERTV, televizionit të kryeministrit (rast ky unik në botë).
Në video mes kamaremanëve dallohet edhe dora e moderatores e gazetares rilindase Anjeza Maja, e cila la profesionin e saj që e ushtronte prej vitesh, për t'iu dedikuar tërësisht ERTV-së.
E kujdesshme me dorën, Anjeza, një prej mikeshave gazetare më të afërta të kryeministrit, kujdeset me iPhonen e saj që Rama të dalë sa më qartë dhe sa më bukur para popullit. Kjo nuk është hera e parë që Maja kujdeset për imazhin e Ramës dhe Veliajt, në disa momente të fiksuara pak kohë më parë ajo rrezikonte të pësonte ndonjë frakturë vetëm e vetëm për të shkrepur foton perfekte.
Maja, njihet edhe për shoqërinë e ngushtë me pronaren e portalit "Tirana Post" të Veliajt, Mira Kazhanin. Moderatorja ishte bashkë me Kazhanin, kur kjo e fundit aksidentoi rëndë një 17-vjeçar në autostradën Tiranë-Durrës, ngjarje e cila u mbulua me profesionalizëm për mediat.
"Mikeshat mavi" janë vënë në shërbim të qeverisë, jo vetëm me propagandë Rilindase në portalet e rrjetet e tyre sociale, por pas kësaj videoje, me përkushtimin dhe profesionalizmin e treguar në punën e tyre si kameramane, mund të themi pa frikë se e meritojnë të paguhen nga taksat tona.
Videoja ku tregohet profesionalizmi i Anjeza Majës në shërbim të liderit suprem