Detaje të reja dalin në dritë nga dështimi spektakolar i Policisë së Lleshit në Korçë gjatë një aksioni për kapjen e personave të shpallur në kërkim.
Një video e re ka mbërritur në redaksinë e JOQ Albania, e cila tregon skenën e pazakontë që ndodhi mu në qendër të Korçës, përballë Katedrales Ortodokse, nga një tjetër këndvështrim.
Në videon e parë nuk dukej qartësisht skena, por në pamjet e reja shihet qartë se çfarë ndodh mes tre efektivëve të policisë dhe personave që dyshohet se janë precedentë penalë.
Siç shihet dhe në video, punonjësit e policisë tentojnë të nxjerrin me forcë nga drejtuesin e automjetit të ndaluar dhe pas disa përpjekjesh arrijnë t'ja dalin.
Mirëpo, drejtuesi i mjetit nuk ndodhej vetëm në mjet, pasi me të ishte edhe një person tjetër.
Njëri nga efektivët ndodhej në derën e pasagjerit dhe thyen xhamin, por tentativa e tij rezulton e pasuksesshme, pasi pasagjeri merr drejtimin e makinës, i jep gaz dhe ia del t'i shpëtojë uniformave blu në mënyrë spektakolare.
Mbase, ky rast për Lleshin mund të cilësohet si sukses, pasi njërin prej personave e arrestuan, por mungesa e profesionalizmit të Policisë lë vërtetë për të dëshiruar.