Shteti e braktisi kur kërkoi ndihmë një vit më parë, ndërron jetë 113-vjeçarja nga Tepelena

Ka ndërruar jetë në moshën 113-vjeçare një nga gratë më të moshuara në Shqipëri, Mineko Rrapa.

E moshuara nga Tepelena, e cila ishte e sëmurë prej disa vitesh, ka mbyllur sytë përgjithmonë ditën e sotme.

E ndjera nuk është një emër i panjohur për publikun shqiptar, pasi një vit ankesa e saj ndaj qeverisë u denoncua në emisionin investigativ "Fiks Fare".

Asokohe, gruaja shekullore shprehej se merrte një pension qesharak prej 56 mijë lekësh të vjetra, para të cilat s'i dilnin as për të blerë ilaçet.

Nënë Mineko kërkonte nga qeveria rritjen e pensionit të saj, por pavarësisht kërkesave të saj shteti s'e vuri aspak ujin në zjarr, ashtu siç po i braktis dhe këtë vit pensionistët, duke u hequr edhe shpërblimin "qesharak" të fundvitit.

Një vit më parë, e ndjera shprehej se këti para i donte vetëm për të blerë ilaçet, ndërsa theksonte se gjithë jetën e saj ka punuar në kooperativë.

Po ma rritën mirë do të bëjnë. Paratë i dua për ilaçe, t’i bëj derman vetes. Kam punuar gjithë jetën në kooperativë. Ato lekë që merrja që atëherë, ato marr tani. S’më dalin për asnjë gjë."

Ndërsa djali i saj u shpreh:

Nëna jonë është 112 vjeçe dhe merr një pension qesharak, 56 mijë lekë të vjetra. Ato lekë s’i dalin as për ilaçe dhe as për gjë. Ajo ka punuar gjatë gjithë kohës, nga krijimi e deri në fund të kooperativës. Na ka rritur dhe ne, Vitet e fundit nuk është në gjendje të mirë shëndetësore."

113-vjeçarja u largua nga kjo botë e braktisur nga shteti, për të cilin punoi gjithë jetën e saj.

Thirrjet e kësaj nëne shkuan në vesh të shurdhët, ashtu si edhe kërkesat e të moshuarve të tjerë, të cilat qeveria po i shkel me të dyja këmbët, duke mos i llogaritur fare si qytetarë të këtij vendi e duke i përbuzur në mënyrën më të turpshme të mundshme.