Një ngjarje e rëndë ndodhi disa ditë më parë në Librazhd, ku shtetasi B.Balla hyri me forcë në shtëpinë e ish-bashkëshortes së tij D.S., duke e djegur me qumësht të valuar në dhomën e gjumit, ku ajo qëndronte me fëmijët.
Por ai nuk u mjaftua me kaq, pasi dhunoi dhe ish-vjehrrën. Ai madje tentoi të mbyste me jorgan ish-gruan, pasi kjo e fundit u shtrua në spital me plagë të rënda.
Fatmirësisht ai zbulua nga mjekët. Sapo pikasi mjekët, B.Balla u hodh nga kati i tretë, ndërsa pak orë më vonë u arrestua nga policia.
Së fundmi, detaje të reja kanë dalë nga kjo ngjarje e rëndë, ku personi në fjalë vijon ta kërcënojë ish-gruan e tij edhe nga qelia e burgut.
Sipas "shqiptarja.com", ai i ka kërkuar ish-bashkëshortes së tij të tërheqë denoncimi, në të kundërt do ta pësojë keq.
"Tërhiqe denoncimin! Thuaj që je djegur vet që të mos bëj burg. Në të kundërt nëse bëj burg i bie të zhdukesh ose të futesh nga ke dalë", janë këto fjalë që Balla i ka thënë ish-bashkëshortes së tij, me të cilën ka dy fëmijë, një djalë dhe një vajzë.
Historia e gruas të re, D.S është e trishtë. Ajo kishte vuajtur ndër vite dhunën e bashkëshortit, i cili kishte guxuar të tregohej jo njerëzor edhe me të bijën e porsalindur, teksa e kishte djegur me cigare.
Drejtësisë i kishte shpëtuar paq, me dënime simbolike, teksa menjëherë sapo doli nga burgu sërish ju rikthye dhunës duke djegur ish-gruan.
Edhe pas hekurave ku qëndron në masë arresti me burg pas kallëzimit që bëri në polici D.S, B. Balla nuk e lë të jetojë e qetë, duke e kërcënuar me jetë.
"Ishalla të marrë dënimin e merituar, sepse nuk kam besim fare tek gjykata. Shpresoj të marrë dënimin maksimal", thotë ajo.
