Një akt i shëmtuar u regjistrua në fundin e ndeshjes Shkumbini-Dinamo e vlefshme për Kategorinë e Parë, teksa gjyqtari Sokol Bebja u dhunua nga disa tifozë, të cilët u futën në fushën e blërtë për të sulmuar arbitrin, shkruan "Panorama Sport".
Në lidhje me këtë ngjarje ka reaguar edhe Federata Shqiptare e Futbollit, që i bën thirrje Policisë së Shtetit të marrë masa urgjentisht për të arrestuar agresorët. Bazuar në nenin 274/A të Kodit Penal, agresorët rrezikojnë në 3 vjet heqje lirie.
REAGIMI I FSHF:
Dhunimi i një zyrtari sportiv, akt i dënueshëm deri në tre vite heqje lirie. Federata e Futbollit dënon me ashpërsi aktin vandal të dhunimit të arbitrit Sokol Bebja në ndeshjen Shkumbini-Dinamo në qytetin e Peqinit.
FSHF i bën thirrje Policisë së Shtetit të marrë urgjentisht masat për të arrestuar agresorët në fjalë dhe kërkon nxjerrjen e tyre të menjëhershme para ligjit, bazuar në nenin 274/A të Kodit Penal.
FSHF garanton se do ta ndjekë deri në fund këtë çështje në të gjitha instancat e drejtësisë. FSHF nuk do të lejojë në asnjë çast nëpërkëmbjen e autoriteteve sportive dhe ndërhyrjet e huliganëve në dëm të cilitdo në ambjentet sportive.