“Po rrezikojmë jetën”, punonjësja e rrobaqepësisë: Godina është degraduar nga tërmeti, puna vijon normalisht

Përveç solidaritetit dhe humanizmit, tërmeti nxorri në pah dhe shpirtligësinë dhe arrogancën e disa personave.

Ndër to janë edhe pronarët që detyruan punonjësit e tyre të vinin në punë, ndonëse godina e biznesit të tyre mund të kishte pësuar dëmtime.

I tillë është edhe një rast i denoncuar në redaksinë e JOQ Albania, ku punonjësja e një rrobaqepësie në Tiranë tregon po rrezikojnë jetën duke punuar në godinën e cila ka marrë dëmtime të konsiderueshme nga tërmeti.

Sipas qytetares, rrobaqepësia në fjalë ndodhet në një godinë 4-katëshe, në fund të rrugës "5 Maji" në kryeqytet.

Punonjësja e rrobaqepësisë tregon se puna ka vijuar normalisht edhe pas tërmetit të fuqishëm. Sipas saj, edhe kur ka patur pasgoditje të forta, përgjegjëset u kanë thënë të vijojnë punën pasi "s'ka asgjë".

Më tej, ajo shprehet se nuk ka ardhur asnjë ekspert për të inspektuar dëmet në godinë.

Mesazhi i plotë:

Pershendetje JOQ! Kjo video eshte bere ne nje rrobaqepesi qe ndodhet ne fund te rruges 5 maji ne tirane. Pavaresisht se dallohet lehte qe godina eshte degraduar, puna vijon normalisht edhe diten pas termetit. Madje edhe kur kishte pasgoditje te forta, pergjegjeset na thoshin vazhdoni punoni se ska gje, pavarsisht se nga tavani binin disa suva. Rrobaqepesia eshte pjese e nje godine te vjeter 4 kateshe. Nuk ka ardh asnje ekspert, vec firma ka marre inxhiniere qe po merren me ndertimin e nje godine te re. Nga e gjithe godina ata kan rrethuar vec nje kend qe sipas tyre paraqet rrezik. Ndoshta vetem kur te vdesin njerez, atehere do kujtohen. Ju lutem postojeni, Faleminderit!"