Marko Gjuriq është politikani serb që nuk ndalet së luftuari shtetin e Kosovës, e madje së fundmi e quajti trillium edhe një prej masakrave që e njeh e gjithë bota, atë të Recakut.
Mirëpo, kjo veprimtari nuk ka ndikuar që këtij personi t’i qëndrohet larg nga politikanët e Kosovës, raporton JOQ Kosova.
Afër me Gjuriqin shihen politikanë të tri partive politike të Kosovës, Arban Abrashi nga LDK, Ardian Gjini nga AAK, e madje edhe Xhelal Svecla i VV-së.
Publikimi i këtyre fotografive ku shiheshin politikanët e Kosovës së bashku me Gjuriqin, ka ngjallur reagim të ashpër në Kosovë. Më së shumti iu drejtuan Xhelal Svecles së VV-së, pasi partia e tij ishin shumë strikt në qëndrimet ndaj këtij politikani.
E reagimi i ashpër i opinionit, solli sqarimin e Sveclës. Ai u mundua të tregojë se takimi nuk ishte planifikuar nga ai, por organizatori i ka ulur pa i pyetur.
“Une sot jam pjesëmarrës në një konferencë për Bashkepunim Rajonal, organizuar nga CIG dhe Ministria e Punëve të Jashtme e Gjermanisë. Në këtë konferencë marrin pjesë përfaqësues të shumë subjekteve politike parlamentare nga rajoni ynë. Sot ka qenë ceremonia e hapjes, dhe vendet dhe tavolinat se ku jane ulur pjesëmarrësit, i kanë caktuar organizatorët e jo pjesëmarrësit. E kuptoj se ka kundërshtarë tanë që jo vetëm se e kanë bërë por edhe e kanë shpërndarë këtë foto me qëllim të keq”, ka sqaruar Svecla.
Ndërkohë, qytetarët po vazhdojnë të komentojnë këtë takim nëpër rrjete sociale, duke theksuar se Marko Gjuriq është vartës i presidentit serb Aleksandar Vuciq i cili, sic thonë qytetarët, ishte ministër në kohën kur u krye kjo masakër.
