Pas rekomandimit të Komisionit të Venecias që Ligji i përdorimit të Gjuhëve të rishqyrtohet pasi me avancimin e shqipes tejkalon standardet evropiane për gjuhët e pakicave, reagojnë partitë politike shqiptare. Aleanca për Shqiptarët, Lëvizja Besa dhe Alternativa me qëndrim unik: shqiptarët nuk janë minoritet dhe shqipja duhet të rirregullohet me Kushtetutë. Aleanca për Shqiptarët vlerëson se nga Komisioni i Venecias nuk duhej të kërkohej mendim për gjithë ligjin, por vetëm për dispozitat që rregullojnë përdorimin e shqipes në bankënota dhe në ushtri, raporton Alsat-M.
Ndërsa Lëvizja konstaton nuk duhet të krijohet përshtypja se Ligji i gjuhëve u jep shqiptarëve diçka më shumë se sa u takon. Kreu i BESË-s vlerëson se është reale që shqipja të rregullohet me Kushtetutë dhe se do të angazhohet që t’i bashkojë të gjitha partitë shqiptare për ta realizuar këtë synim.
Për partinë Alternativa zgjidhja e problemit qëndron tek zgjidhjet kushtetuese që do të mbyllnin kontestet e brendshme.
