Tërmeti shkatërrimtar i 26 nëntorit la pas 51 viktima, mbi 750 të plagosur, si dhe mijëra ndërtesa të shkatërruara e rrënuara terësisht.
Kjo ishte fatkeqësia më e madhe natyrore që ka goditur Shqipërinë në dekadat e fundit, ndërsa vendi ndodhet në gjendje emergjence për përballimin e dëmeve të shkaktuara nga tërmeti, të cilat janë kolosale.
Durrësi dhe Thumana ishin dy zonat më të prekura nga tërmeti i fuqishëm, ku përveç lotëve dhe dhimbjes pafund nga humbja e dhjetra jetëve njerëzore, ndërtesa të shumta, përfshi edhe institucionet arsimore, pësuan dëmtime të mëdha nga lëkundjet e forta të tokës.
Së fundmi, një video e mbërritur në redaksinë e JOQ Albania, tregon dëmtimet e rënda që ka lënë pas tërmeti në shkollën 9-vjeçare "Neim Babameto", në lagjen 15, në Spitallë të Durrësit.
Ka qenë një nga nxënësit e kësaj shkolle që ka dërguar videon, ku shihen pjesë të mureve që janë shembur plotësisht, ndërsa godina ka pësuar çarje dhe dëmtime të mëdha.
Me të drejtë nxënësi ngre një pyetje: Po sikur tërmeti të binte gjatë kohës së mësimit?
Siç mund të kuptohet qartë dhe nga këto pamje, në këtë shkollë nuk mund të zhvillohet procesi mësimor, për shkak të dëmtimeve të rënda që ka pësuar struktura e godinës. Megjithatë, do të jenë ekspertët ata që do të vlerësojnë nëse kjo ndërtesë do të rikonstruktohet apo duhet të shembet.
Mesazhi i plotë:
Kjo shkollë është rikonstruktuar gjatë viteve të fundit, por nuk mundi dot t'u rezistonte lëkundjeve të fuqishme sizmike.
