Rama e pezulloi nga Banka e Shqipërisë, Malaj: Sfidat me të paaftët i kam fituar përherë

Teksa jemi në pikun e emergjencës kombëtare për përballimin e dëmeve të shkaktuara nga tërmeti shkatërrimtar i 26 nëntorit, "Rilindja" ndërmori një akt të paprecedentë, me qëllim "zhdukjen" e të gjithë zërave kritikë brenda kampit socialist.

Arben Malaj, i cili është një ndër të paktët figura të shquara të PS-së që ka ngritur zërin kundër qeverisë herë pas here, u pezullua nga detyra si anëtar i Këshillit Mbikëqyrës të Bankës së Shqipërisë.

Vendimi për pezullimin e Malajt u publikua sot pasdite në Fletoren Zyrtare, me propozim të kryeministrit Rama.

Pas këtij vendimi, ka ardhur edhe reagimi i ish-ministrit të Financave, Arben Malaj.

Me anë të një postimi në "Facebook", Malaj thekson se sfidat me të paaftët dhe shpifësit i ka fituar gjithmonë, si nga ana morale, ashtu dhe nga ajo ligjore.

Malaj u emërua në këtë post në Korrik të vitit 2016.

Reagimi i plotë:

Të dashur miq, sapo më njoftuan se qeveria ka vendosur pezullimin tim si anëtarë i Këshillit Mbikëqyrës së Bankës së Shqipërisë. Tani do ta kem më të lehtë të përballem publikisht dhe ligjërisht me shpifësit dhe abuzuesit me pushtetin. Falënderoj të gjithë ata që më kanë mbështetur dhe inspiruar që vendit tim ta shërbej me dashuri, profesionalizëm dhe integritet. Sfidat më të paaftët dhe shpifësit i kam fituar përherë moralisht dhe ligjërisht. Asnjë karrige ministrore apo partiake nuk më ka penguar në angazhimet e mia profesionale, shkencore dhe politike. Ju falënderoj! Arbeni!"