Një 29-vjeçar nga Kukësi është proceduar penalisht pasi akuzohet se ka tentuar të transferojë para në mënyrë të jashtëligjshme.
Raportohet se aksioni është realizuar nga policia e Vlorës, ku kanë sekuestruar plot 57 mijë euro.
Mbi të riun rëndon akuza “Mosdeklarimi në kufi i të hollave dhe sendeve me vlerë”.
Ai nuk deklaroi shumën e parave që posedonte në pikën e kalimit kufitar në Vlorë, i cili udhëtonte me një automjet me targa gjermane.
Njoftimi i Policisë Kufitare të Vlorës:
Policia Kufitare e Vlorës parandalon një rast të tentativës për transfertë të parave në mënyrë të paligjshme. Sekuestrohen 57000 euro dhe procedohet penalisht poseduesi i tyre, pasi nuk i deklaroi në kufi. Në Pikën e Kalimit Kufitar Vlorë, shërbimet e Policisë Kufitare, në bashkëpunim me Drejtorinë e Doganës Vlorë dhe DVP Vlorë, pas kontrollit në vijën e dytë të një automjeti me targë gjermane kanë konstatuar të fshehura në brendësi të mjetit dy pako të mbështjella, brenda të cilave kishte një sasi eurosh të padeklaruara në kufi. Nga verifikimet e mëtejshme rezultoi se në automjet ishin fshehur rreth 57000 euro. Drejtuesi i mjetit, shtetasi E. P., 29 vjeç, banues në Kukës është shoqëruar drejt Drejtorisë Vendore të Policisë Vlorë dhe në përfundim të veprimeve u procedua penalisht në gjendje të lirë, për veprën penale “Mosdeklarimi në kufi i të hollave dhe sendeve me vlerë”.