Enea Jorgji është një nga arbitrat shqiptarë më të mirë në qarkullim. Prej disa vitesh, ai mban stemën e FIFA-s, dhe kohët e fundit UEFA po i beson edhe ndeshje të rëndësishme ndërkombëtare.
Pasi gjykoi javën e kaluar në Europa Ligë, Enea Jorgji do të ketë një tjetër ndeshje, ku skuadrat janë edhe më të rëndësishme.
Kësaj here, për gjyqtarin ndërkombëtar është caktuar sfida e Ligës së Kampionëve për të rinj, “UEFA Youth League” mes Interit dhe Barcelonës, shkruan "Panorama Sport".
Në sfidën e datës 10 dhjetor, ndërkombëtari shqiptar pritet që të ketë si asistentë Denis Rexhën dhe Dojando Myftarin.
Kjo sfidë, vjen në vigjilje të përballjes së fundit në Ligën e Kampionëve edhe për skuadrat A, teksa gjyqtarët shqiptarë do të kenë gjithashtu ftesën që të ndjekin në “San Siro” përballjen mes zikaltërve dhe katalanasve, tashmë të kualifikuar.