Pasditen dhe mbrëmjen e sotme ka patur trafik të rënduar në aksin rrugor Plepa-Shkozet.
Kjo pasi qytetarët e shumtë që u larguan nga Durrësi drejt qyteteve më të sigurta pas tërmetit shkatërrimtar të së martës kanë vendosur të rikthehen në banesat e tyre, pas qetësimit të situatës.
Siç shihet dhe në videon e dërguar nga një qytetar në redaksinë e JOQ Albania, trafik i rënduar është krijuar në rrethrrotullimin e Plepave në Durrës.
Rëndimi i trafikut është shkaktuar edhe pas bllokimit të aksit Plepa-Durrës, pasi ka nisur procesi i shembjes së disa ndërtesave që pësuan dëmtime të mëdha struktorore nga tërmeti, ndonëse ndaj tyre nuk u krye ekspertimi nga specialistët, për të përcaktuar arsyen pse u shembën, gjë e cila do të nxirrte në pah fajtorët e vërtetë që fshihen pas ndërtesave që u shkatërruan.
