JOQ Albania publikoi mbrëmjen e sotme një video me pamje të rënda, ku shfaqeshin tre të rinj duke dhunuar barbarisht një 30-vjeçar, në qytetin e Beratit.
Ngjarja e rëndë ndodhi më 17 nëntor në lagjen "13 Shtatori", ndërsa policia njoftoi se tre dhunuesit u vunë në pranga.
Burime ekskluzive për JOQ Albania bëjnë me dije se shkak i sherrit ka qenë një femër.
Viktima e dhunës barbare, 30-vjeçari me iniciale N.Ç nga fshati Duhanas i Beratit, raportohet se ka ngacmuar disa ditë më parë familjaren e njërit prej tre djemve.
Kaq mjaftoi që familjari i vajzës në fjalë, të marrë dy shokët e tij dhe të zënë në befasi 30-vjeçarin, duke ushtruar dhunë fizike ndaj tij. Ky i fundit mbeti i plagosur rëndë dhe përfundoi në spital, për shkak të goditjeve të forta të marra në kokë.
Të rinjtë u akuzuan nga Policia për "plagosje të rëndë me dashje, e kryer në bashkëpunim", ndërsa prokuroria kërkoi "arrest me burg".
Gjykata e Rrethit Gjyqësor Berat, e bazuar në një akt-ekspertimi mjeko-ligjor, që e cilësonte "plagosje të lehtë", i la të lirë tre dhunuesit, duke vendosur masën e sigurisë "Detyrim paraqitje".
Ajo që vlen të theksohet ishte vendimi absurd i gjykatës, pasi pamjet filmike dëshmuan qartë se ndaj 30-vjeçarit u ushtrua dhunë barbare fizike, saqë mbeti pa ndjenja në tokë, ku pavarësisht kësaj një prej agresorëve e goditi me sa fuqi kishte me shkelm në kokë.
Ndërkohë që ende nuk dihet versioni i viktimës lidhur me ngjarjen e rëndë.
Njoftimi i Policisë së Beratit për ngjarjen:
