Qeni është një ndër kafshët shtëpiake më të dashura për njeriun.
Për më shumë se 12.000 vjet, qeni ka qenë një shoqërues, mbrojtës dhe mbi të gjitha, një mik besnik.
Jemi njohur me video ku qentë kanë rrezikuar jetën, madje edhe janë vetëflijuar për t’u shpëtuar njerëzve jetën. Të gjitha këto të bëjnë t’i duash pafund këto krijesa të veçanta.
Po si trajtohen në Shqipëri këto kafshë kaq të dashura për njeriun?
Ditën e sotme në redaksinë e JOQ Albania, kanë mbërritur pamje tejet të trishta, që të prekin thellë në shpirt, ku protagonistë janë dy qenushë të vogël e të pafajshëm, një prej të cilëve gjallë dhe një tjetër, që e kanë masakruar, duke i prerë kokën.
Siç shihet dhe në fotot e mëposhtme, ndonëse një prej këlyshëve ka vdekur, qenushi tjetër nuk largohet e nuk e braktis, por qëndron aty pranë tij.
Ende nuk dihet se kush e ka bërë këtë akt kaq të pamëshirshëm e monstruoz, sa të masakrojë në këtë mënyrë një këlysh të vogël qeni, vetëm disa muajsh.
Fotot janë realizuar mëngjesin e sotëm në Kamëz.
Ajo që vlen të theksohet është se qen vrasësit më të mëdhenj në Tiranë janë punonjësit e Policisë Bashkiake të kryeqytetit, të cilët kanë nisur një fushatë "gjenocidi" mbi këto kafshë të gjora e të pambrojtura.
Lidhur me këtë çështje, në emisionet investigative, por edhe nga aktivistë e qytetarë të thjeshtë, janë denoncuar me dhjetëra raste, të provuara me foto e video, ku punonjësit e Policisë Bashkiake të Tiranës, me në krye Ermal Kapllanin, akuzohen për masakrën e kryer ndaj qindra qenve endacakë, të cilët janë vrarë përmes acidit të baterive të makinave, duke ua injektuar atë në trup, por edhe me mjete të tjera.
Ndërkohë që homologu i Veliajt në Prishtinë, Shpend Ahmeti, ka ndërmarrë pak ditë më parë një nismë për ndërtimin e një strehimoreje për qentë endacakë në kryeqytet, kryebashkiaku i Tiranës me "ushtrinë" e tij vijojnë me masakrat ndaj krijesave më të dashura për njerëzit.
Por duket se Bashkia e Tiranës është shumë larg ndërmarrjes së këtij hapi, pasi fokusin primar e ka tek tenderat, lejet e ndërtimit dhe betonizmin e çdo hapësire të mundshme të gjelbër në kryeqytet.
