Dy të rinj janë vënë në pranga nga policia e Kukësit pasi janë kapur duke trafikuar 12 shtetas nga Siria. Policia bën me dije se është arrestuar 29-vjeçari me iniciale B.D dhe 22-vjeçari me iniciale M.R, të dy banues në Tiranë.
Ata kishin futur në makinat e tyre sirianë, të cilët nuk dispononin dokumente identifikimi.
Nuk është hera e parë që refugjatë nga vendet e botës së tretë zgjedhin Shqipërinë si rrugë kalimi drej vendeve të Ballkanit apo edhe shteteve të tjera të Europës.
Njoftimi i policisë:
Policia e Kukësit ka arrestuar dy persona që u kapën duke transportuar 12 shtetas sirianë.
Në pranga ranë:
-B. D., 29 vjeç, banues në Tiranë, i cili u kap në hyrje të qytetit të Kukësit, ku në automjetin tip BMË po transportonte 5 shtetas sirianë
-M. R., 22 vjeç, banues në Tiranë, që u kap në aksin Kukës-Morinë, tek kthesa e Kolshit, ku në automjetin tip Furgon, po transportonte 7 shtetas sirianë.
Uniformat blu raportojnë se shtetasit sirianë nuk dispononin dokumente identifikimi.
Materialet i kaluan për veprime të mëtejshme Prokurorisë së Rrethit Gjyqësor Kukës, për veprën penale “Ndihma për kalim të paligjshëm të kufijve".