Një 38-vjeçar, i cili konsiderohej me rrezikshmëri të lartë, u vu në prangat e policisë ditën e djeshme në zonën e "Liqenit të thatë" në Tiranë.
Gjatë kontrollit që iu bë në automjetin e tij, policia gjeti dhe sekuestroi edhe bllokues valësh të celularëve, një pajisje e sofistikuar që përdoret shpesh nga grupet e strukturuara kriminale.
Burime zyrtare nga Policia e Tiranës bëjnë me dije se personi i arrestuar është Bledi Haka.
Sipas policisë, dyshohet se Haka mbante me vete bllokues valësh për shkak se i frikësohej një atentati me eksploziv.
Gjithashtu 38-vjeçarit iu gjetën dhe sekuestruan edhe armë, një sasi e madhe parash, si dhe lëndë psikoaktive e dyshuar "pluhur i bardhë".
Haka nuk është një emër i panjohur për policinë, pasi gjatë një konflikti në një lokal në shtator të vitit 2012, ai mbeti i plagosur.
Ngjarja ndodhi në zonën e Porcelanit, ku shtetasi Endrit Daci qëlloi me armë zjarri ndaj Bledi Hakës dhe dy personave të tjerë që ndodheshin në lokal.
Tre personat që ndodheshin në tavolinë, dyshohet se kanë pasur një konflikt me pronarin e lokalit, shtetasin me iniciale Sh.Sh, 47 vjeç.
Ky i fundit besohet se u ka treguar të afërmve për konfliktin që kishte me tre personat që ishin ulur në lokalin e tij dhe, për pasojë, nipi i pronarit, shtetasi Endrit Daci, ka shkuar në vendin e ngjarjes me një kallashnikov.
Ai ka shtënë me armë, duke plagosur shtetasin Bledi Haka dhe Dritan Qello. I lënduar lehtë ka mbetur edhe vetë pronari i lokalit, i cili ka marrë ndihmë mjekësore ne spital.
