Banorët e "Unazës së Re" zhvilluan mbrëmjen e sotme protestën e rradhës kundër prishjes së banesave të tyre, e cila u shoqërua nga tensione dhe përplasje mes protestuesve dhe forcave të policisë.
Terrori i policisë nisi dy ditë më parë, ku u arrestuan 6 protestues, tre nga të cilët u dënuan nga gjykata me masën e sigurisë "arrest me burg", si dhe u ushtrua presion ndaj medias që po raportonte protestën.
Edhe ditën e sotme vijoi raprezalja e rradhës me banorët e "Unazës së Re", që kanë disa muaj që po protestojnë kundër shembjes së banesave të tyre.
Arrestimet janë kryer pas mbylljes së protestës, nga punonjës të policisë të veshur si civilë, në zonat ku mungon ndriçimi.
Burime zyrtare nga Policia e Tiranës njoftuan orët e vona të mbrëmjes së sotme se janë arrestuar në flagrancë 10 persona, si dhe janë shoqëruar edhe 5 të tjerë.
Mes të ndaluarve nga policia është edhe ish-deputeti demokrat, Klevis Balliu.
Njoftim i Policisë
Tiranë – 15 të shoqëruar për bllokimin e rrugës në zonën e Unazës së Re, mbrëmjen e sotme, 10 të arrestuar në flagrancë
Shërbimet e Komisariatit të Policisë Nr. 6, arrestuan në flagrancë për veprat penale “Organizimi, pjesëmarrja, grumbullimi dhe manifestime të paligjshme”, “Pengimi i qarkullimit të mjeteve të transportit”, “Prishje e rendit dhe qetësisë publike, “Kundërshtimi i punonjësit të policisë së rendit publik” dhe "Mosbindja ndaj urdhrit të punonjësit të policisë së rendit publik", shtetasit:
– R.M., 46 vjeç, lindur në Kukës, banues në Tiranë; – S.M., 51 vjeç, lindur në Kukës, banues në Tiranë; – B.N., 26 vjeç, lindur në Dibër, banues në Tiranë; – K.Y., 59 vjeç, lindur në Skrapar, banues në Tiranë; – B.N., 60 vjeç, lindur e banues në Tiranë; – A.Th., 38 vjeç, lindur në Kukës, banues në Tiranë; – A.M., 49 vjeç, lindur në Patos, banues në Fier; – K.B., 30 vjeç, lindur e banues në Tiranë; – D.N., 25 vjeç, lindur e banues në Tiranë; – A.Sh., 25 vjeç, lindur në Peqin, banues në Tiranë.
Gjithashtu u proceduan penalisht në gjendje të lirë 5 shtetasit: G.D., T.N., E.H., A.B. dhe Ç.M., nga Tirana.
Ndërkohë vijon puna për identifikimin e personave të tjerë të përfshirë në bllokimin e aksit rrugor.
Këta shtetas në rrugën “Teodor Keko” në zonën e Unazës së Re kanë organizuar e zhvilluar një tubim të paligjshëm dhe kanë penguar qarkullimin e mjeteve të transportit rrugor në të dyja drejtimet e rrugës, duke kundërshtuar dhe mos iu bindur thirrjeve të Policisë për të liruar rrugën.
Me ndryshimet e reja në Kodin Penal, bllokimi i rrugëve duke penguar lëvizjen e lire të automjeteve është vepër penale dhe dënohet me burg. Policia e Shtetit u bën thirrje qytetarëve të mos bien pre e keqpërdorimeve, por të protestojnë në mënyrë të ligjshme dhe në vende ku nuk pengohet qarkullimi i automjeteve.
Bllokimi i rrugës nuk do të tolerohet dhe personat përgjegjës do përballen me drejtësinë.
Policia e Shtetit garanton banorët e Unazës së Re dhe cilindo që do të protestojë, se është e gatshme dhe e angazhuar për të siguruar dhe garantuar çdo protestë të ligjshme që nuk bie ndesh në cēnimin e lirive dhe të drejtave të qytetarëve.
