Tepër kontradiktore janë dëshmitë e Marsida Qatjas si për Prokurorinë edhe për mediat. Teksa në fillim është shprehur se nuk ka pasur asnjë lloj lidhje dashurie me viktimën, Dritan Haxhollin, në një dëshmi të dytë ka pohuar se të dy kanë qenë të dashur, edhe pse ajo ishte e martuar.
Më tej, në intervista për disa nga mediat e vendit, Marsida ka mohuar të jetë konsumatore e lëndëve narkotike, ndërsa për prokurorinë, në dëshminë e saj të dytë, ka thënë se natën që ndodhi ngjarja ka konsumuar kokainë.
Në dëshminë e dytë Marsida Qatja ka rikonfirmuar lidhjen me 41 vjeçarin Dritan Haxholli. Pas shqetësimeve të kohëve të fundit ajo pranoi para hetuesve se kishte thirrur shefin e sigurisë së burgut të Durrësit Bledar Toçin për ndihmë. 30 vjeçarja ka thënë se shoku i saj erdhi për të ndërhyrë që Haxholli mos ta bezdiste më. Atë mbrëmje nëna e tre fëmijëve ishte edhe në shoqërinë e Xhulio Biturku dhe një fqinji tjetër të cilët kishin njohje prej kohësh. Gruaja ka pohuar sipas “ABC News” se para se të ndodhte sherri konsumuan kokaine dhe njëri prej djemve ishte larguar për të marrë sërish drogë kur u përplasën me armë Haxholli me Toçin.
