Rreth 35 milje në veri të Dover-it, 40 minuta me makinë, mund të gjeni vendin e quajtur Margate në Kent, një vend bregdetar me një histori të pasur detare.
Që nga viti 1760 Margate ka qenë një nga destinacionet e preferuara të londinezëve për pushime për shkak të plazheve.
Ajo që e bën Margate-n vend special është edhe prania e një shpelle misterioze. Kjo shpellë ndodhet poshtë shtëpive në jo më shumë se 2 metra thellësi.
Ishte viti 1835, kur James Neëloë po gërmonte pranë qytetit bregdetar, duke dashur të krijonte një liqen të vogël artificial me qëllim që djali i tij të mund të luante me patat.
Megjithatë, lopatën ia 'gëlltiti' dheu dhe befasisht iu zhduk nga dora. Djali i Jamesit, vendosi që në gropën e hapur të zbresë me litar për të parë se për çfarë bëhej fjalë.
Ata as që kishin ëndërruar që një ditë do të zbulonin diçka kaq madhështore, që nuk ekziston askund tjetër në botë.
Poshtë tokës ishte një tempull 'magjik' i zbukuruar me miliona guaska.
Sipas ekspertëve, bëhet fjalë për një hapësirë prej rreth dymijë metra katrorë, me dekorime dhe mozaikë të përbërë prej 4.6 milionë guaska.
Në vendkalimin nëntokësor ka edhe dhoma me altarë, ndërsa personit të parë që i ra ndërmend që nga kjo hapësirë të fitojë para, është një mësues që e bleu tokën mbi dhomën e fshehtë dhe e rregulloi në mënyrë që vizitorët të mund të futen. E vetëm dy vite më vonë, më 1837, shpella u hap për të gjithë kureshtarët.
Gjithsesi, ende nuk është sqaruar se si është ndërtuar ky mozaik, edhe pse spekulohet se bëhet fjalë për romakët e të tjerë pretendojnë se tempulli u ndërtua në shekullin e 18-të, dhe pas tij qëndron një shoqëri e fshehtë.
