Një qen besnik ka ndenjur për një muaj në një stacion treni me shpresën se pronari do t'i kthehej një ditë.
Por, për fat të keq, Facundo Brusco, nuk u kthye më pasi ai kishte ndërruar jetë pikërisht në atë stacion treni. Qeni Toto ishte me pronarin e tij në El Jaguel, Buenos Aires kur Brusco ndërroi jetë më 14 gusht.
E ëma e Facundo-s, Karina, u shpreh për mediat se qeni dhe djali i saj rrinin shumë bashkë duke shtuar se Toto e shoqëronte gjithnjë gjatë rrugës që ai bënte për të shkuar në punë.
Për fat të keq 27-vjeçari kishte probleme me shëndetin mendor dhe madje kishte filluar të konsultohej me një psikolog. Gjithsesi, pasi luftoi për vite me radhë me depresionin, ai i mori vetes jetën tek stacioni i trenit.
Që prej asaj dite, Toto, si qen besnik që është, vazhdoi të rrinte tek pjesa e shinave ku ndodhi incidenti. Kjo zgjati për një muaj, derisa disa banorë aty pranë njoftuan një organizatë që merret me strehimin e kafshëve.
Pasi streha e kafshëve e bëri rastin publik në mediat sociale, e ëma e pronarit të tij të ndjerë e njohu dhe e mori sërish në shtëpi.
Burimi:UNILAD|Përktheu dhe Përshtati: JOQ Albania
