Rreziku nga tërmetet, flet sizmiologu i njohur: Jemi një vend sizmik, duhet të mësohemi me këtë dukuri

Pas tërmetit të fuqishëm me magnitudë 5.8 të shkallës Rihter që shkundi vendin, i cili u pasua nga disa lëkundje të tjera, ku më e fuqishmja ishte 5.2 e shkallës Rihter, paniku dhe frika ende vijojnë të mbizotërojnë në vend.

Tërmeti la pas qindra banesa të dëmtura si dhe mbi 100 persona iu drejtuan spitaleve për të marrë ndihmë mjekësore.

Lidhur me këtë situatë ka reaguar edhe sizmiologu i njohur Llambro Duni.

I ftuar në emisionin "Rudina" në Tv Klan, Duni tregoi se Shqipëria është një vend sizmik dhe se duhet të mësohemi me këtë dukuri natyrore.

Ai tha:

Ne jemi një vend sizmik, e kemi harruar këtë. Të jesh vend sizmik do të thotë të mësohesh me këtë dukuri.”

Sizmiologu gjithashtu shpjegoi edhe dallimin midis dy njësive të matjes së tërmetit, e cila shkaktoi polemika për shkallën e vlerësimit në Rihter apo në ballë.

Sipas tij, Rihter është energjia që çlirohet në vatrën e tërmetit, ndërsa ballë është shprehja e energjisë në sipërfaqe, pra ajo që ndodh në sipërfaqe.

Ai shtoi:

Janë dy parametra që shprehin të njëjtën gjë. Në Rihter jepet energjia që çlirohet në vatrën e tërmetit, shprehet në parametra fizikë. Çdo instrument që regjistron një tërmet është në gjendje të masë edhe energjinë që ai çliron. Kur themi madhësia 5 sipas shkallës Rihter nuk ka vend për ballë, është 5 Rihter, kaq. Ballë është shprehja e energjisë në sipërfaqe, ajo çka ndodh në sipërfaqe, dëmet dhe efektet që lë. Ky tërmet që përjetuam ishte 7-8 ballë dhe në shkallë Rihter 5.8."