Fakti që vëmendja këto ditë është fokusuar tek tronditjet e tërmeteve, kjo nuk e fsheh aspak faktin që Tirana prej ditësh vuan mungesën e furnizimit me ujë.
Por pavarësisht se ujë nuk ka, Shoqëria e Ujësjellës Kanalizime Tiranë përmes një shkrese ka njoftuar të gjithë klientët e saj që do të nisë procedurën për verifikimin dhe kolaudimin e aparateve matës të konsumit të ujit, që ata kanë në pronësi.
Në raste se këto aparate e kanë kaluar limitin e përdorimit që është 5 vjet atëherë sipas urdhrit 195, date 09.03.2009, “Për verifikimin fillestar dhe pasardhës të instrumenteve matëse ligjërisht të kontrolluara” të Ministrisë së Ekonomisë, Tregtisë dhe Energjetikës, ka nevojë që të ndërrohet. Por në rast se duhet ndryshuar atëherë faturën e pagesës do e marrin mbi vete qytetarët.
Ujësjellësi i njofton klientët se ata duhet të jenë të pranishëm gjatë kryerjes së kësaj procedure për të bërë sa më transparent këtë proces bashke me përfaqësuesit e UKT dhe të subjektit të autorizuar nga Drejtoria e Përgjithshme e Metrologjisë për kolaudimin e ujëmatëseve. Në përfundim të verifikimit/kolaudimit aparati ujëmatës do të pajiset me vulën e verifikimit, e cila do të certifikojë përmbushjen e përcaktimeve ligjore dhe teknike për aparatin, shkruan monitor.al
Në rast se qytetarët nuk marrin masa për të ndërruar aparatin atëherë UKT do të vërë një ujëmatës të ri dhe shpenzimet do vendosen në faturën e radhës. Duan s’duan do e paguajnë.
