Vazhdojnë të bien gurë nga “Shkëmbi i Kavajës”, banorët të shqetësuar: Edhe pallati ku jetojmë ne është i çarë, askush nuk interesohet

Pas tërmetit të fuqishëm të së shtunës kanë filluar të rrëzohen pjesë edhe nga Shkëmbi i Kavajës.

Edhe sot që kanë kaluar dy ditë, situata në këtë zonë vazhdon të jetë alarmante. Kjo pasi raportohet se vazhdojnë të bien masive shkëmborësh në rrugë.

Veç masivit të shkëmbinjve që bien në rrugë, dëmet e shkaktuara nga lëkundjet e tokës në këtë zonë janë të konsiderueshme.

Duke folur për “News24”, banorët kanë thënë se ndonëse zona është ndërtuar së fundi, në dhjetëvjeçarin e fundit, pasojat e tërmetit kanë qenë të mëdha, jo vetëm për shkak të fuqisë së madhe të lëkundjes, por edhe për arsye se ndërtimet nuk kanë qenë cilësore.

Veç dëmeve në banesa, banorët vijojnë të jenë të frikësuar nga gurët që bien prej shkëmbit. Ata thonë se gurët vijojnë të bien çdo ditë, pas tërmetit, dhe se shkëmbi ka qëndruar vetëm se nuk ka pasur lagështirë.

Qytetari u shpreh:

Shkëmbi ka qëndruar vetën se nuk ka pasur lagështirë, por çdo ditë vazhdon të bjerë, që pas rënies së tërmetit. Edhe pallati ku jetojmë ne është i carë nga kati i parë deri në të nëntin. Është pranë shkëmbit. Asnjë nuk ka ardhur që të interesohet për këtë punë."