Pas panikut të përhapur ditën e djeshme në lidhje me një tërmet 'shkatërrues' që do të godiste vendin, situata në qytetin e Durrësit duket se është qetësuar.
Në “Niko Dovana”, vijojnë të qëndrojnë ende dy familje durrsake, pasi tërmeti iu ka shkatërruar banesat.
Por, gazetari Osman Stafa tha për “BalkanWeb” se deri pas mesnatës stadiumi i Durrësit ka qenë i mbushur plot me njerëz. Sipas tij, durrsakët i lanë shtëpitë mbrëmjen e kaluar pas alarmit të rremë të shpërndarë në rrjetet sociale se tërmeti 6 ballësh do të godasë vendin.
Të alarmuar dhe në panik nga lajmi, ata janë larguar menjëherë nga shtëpitë e tyre, duke mbushur stadiumin. Si duket, qytetarët janë larguar nga stadiumi pas mesnatës, duke u kthyer një pjesë nëpër shtëpi dhe një pjesë tjetër te të afërmit e tyre.
Kujtojmë këtu se edhe rrugët e sheshet e Tiranës u mbushën plot me njerëz të frikësuar natën e kaluar pas orës 22.00.