Lajmi i rremë, në të cilin u tha se një tërmet me magnitudë 6 ballë do të godasë vendin mbrëmjen e së dielës në orën 23:30, ka shkaktuar tmerr dhe panik tek qytetarët të cilët dolën jashtë banesave të tyre të lemerisur.
Së fundmi, lidhur me këtë lajm, Policia e Shtetit ka zbarkur në ambientet e televizionit dhe portalit "Syri".
Lajmi është bërë me dije nga vetë media në fjalë, të cilët përmes një artikulli tregojnë se "Edi Rama kërkon të mbyllë fjalën e lirë".
Ende është i paqartë burimi i lajmit që tmerroi dynjanë sot në mbrëmje, ndërkohë portali "Syri.net", shkruan se e kanë përgënjestruar vetë më vonë njoftimin në fjalë.
Lidhur me ngjarjen në fjalë, ka ardhur edhe reagimi zyrtar i Policisë, ku sqarohet se lidhur me lajmin e rremë janë shoqëruar në ambientet e komisariatit dy gazetarë.
Sipas policisë, bëhet fjalë për gazetarin e portalit "SYRI.net", Aurel Rakipllari, si dhe gazetaren Daniela Grica e "Shekullit".
Njoftimi i policisë:
Menjëherë pas publikimit të një lajmi të rremë në portalin "SYRI.net" dhe më pas edhe në disa portale të tjera, se sipas parashikimeve të një sizmologu grek do ketë në orën 23.30 një tërmet të fuqishëm, lajm i cili shkaktoi panik të madh tek qytetarët të cilët braktisën banesat dhe dolën në rrugë, Shërbimet e Drejtorisë Vendore të Policisë Tiranë kanë shoqëruar në Polici gazetarin e portalit "SYRI.net", Aurel Rakipllari dhe gazetaren Daniela Grica e "Shekullit", për veprime të mëtejshme, të cilët kanë bërë publikimin e këtij lajmi të rremë, me pasoja paniku te qytetarët. Policia e Shtetit ka ngritur nëj grup të posaçëm hetimor për të bërë të mundur zbardhjen e plotë të autorësisë së këtij lajmi dashakeq që krijojë frikë e panik tek qytetarët. Policia e Shtetit ju bën thirrje qytetarëve që të ruajnë qetësinë dhe të mos bien pre e njoftimeve dashakeqe dhe siguron ata se cilido që do përhapë njoftime të tilla do të përballet me forcën e ligjit. Policia e Shtetit kërkon mirëkuptimin e medias që të tregohen më të kujdesshëm në njoftimet që shpërndajnë, duke kërkuar informacion zyrtar para publikimeve të lajme që krijojnë frikë e panik tek qytetarët.
