Ka mjaftuar shpërndarja e një lajmi të rremë që mijëra qytetarë të braktisin banesat e të dalin në rrugë në pritje të tërmetit "apokaliptik" që parashikohej të godiste vendin në orën 23:30.
Njoftimi u shpërnda me shpejtësi në rrjetet sociale, duke bërë që të mëdhenj e të vegjël të "pushtojnë" rrugët e Tiranës dhe Durrësit.
Ora 23:30 kaloi, asgjë nuk ndodhi, por sërish qytetarët vijojnë të jenë në të mbërthyer nga frika.
Si asnjëherë tjetër, në redaksinë e JOQ Albania kanë mbërritur me qindra mesazhe që tregonin panikun që mbretëron në dy qytetet më të mëdha të vendit.
Në dalje të Tiranës me mijëra makina duke u "arratisur" nga kryeqyteti drejt qyteteve "më të sigurta".
Ndonëse pati thirrje edhe në media që asgjë nuk do të ndodhte, lajmi i "parashikimit të sizmiologut grek" për tërmetin "apokaliptik" që do të shkundte vendin kishte marrë dhenë.
Një popull i tërë, i ngritur në këmbë nga një njoftim i rremë, ndoshta mund të jetë hera e parë që regjistrohet si rast, jo vetëm në Europë, por dhe në botë.
Qytetarët duhet të jenë të informuar se tërmetet kurrë nuk mund të parashikohen dhe nuk duhet të besojnë çdo njoftim nga persona dashakeqë, që kërkojnë të përhapin panik dhe tmerr.
