Mbi 100 persona mbetën të lënduar dhe qindra banesa u dëmtuan nga tërmeti i ditës së djeshme që goditi Shqipërinë, epiqendra e të cilit ishte në qytetin e Durrësit.
Tërmeti me magnitudë 5.6 ballë i shkallës Rihter dhe goditjet e tjera të mëvoshme që e pasuan atë, shkaktuan panik frikë dhe panik tek qytetarët, sidomos në qytetin e Durrësit dhe Tiranës, ku dhe pasojat ishin më të mëdha.
Nga ana tjetër, qeveria po përpiqet ta paraqesë situatën nën kontroll, por jo gjithçka është ashtu siç duket.
Ministri i Brendshëm Sandër Lleshaj ka publikuar sot në rrjetet sociale disa foto nga shtëpia e një qytetari në Porto Romano.
Sipas ministrit, shtëpia e Zef Balës ishte më e prekura nga dëmet e tërmetit, dhe ai i kishte kërkuar me insistim që të largohej prej aty.
Por shtëpia e Zef Balës ka që prej 2 vitesh e rrënuar dhe shteti nuk ka vënë asnjë dorë. "Faxweb.al", e ka publikuar si rast shtëpinë e Zefit, në fundin e vitit 2017, por për të qeveria Rama nuk u kujtua dhe as i gjetën nje strehë më të sigurtë.
Shteti për Zefin mendoi për ti bërë legalizimin një shtëpie që cdo ditë zgjohej me avancim të carjes së mureve, ndërsa gjysma e banesës ishte shembur duke e lënë gjysmën tjetër me themele të hapur.
Zefi tregonte asokohe se kishte blerë hallin me lek, për të ndërtuar një shtëpi që shumë shpejt mund të shembej mbi të dhe familjarët e tij.
Ministri Lleshaj u kujtua në rast tërmeti për të “vjedhur” vëmëndjen e të gjithëve, duke i treguar qytetarëve se po punohet dhe se qeveria është me ta.
Por kjo propagandë, sa për sy e faqe, nuk ja zbehin Zefit vitet që ka kaluar në atë shtëpi të rrënuar dhe as frikën për jetën e fëmijëve të tij.
