Kaluan natën jashtë, çifti i moshuar tregon tmerrin nga tërmeti: Ishte llahtar, u bllokuam në ashensor

Lëkundjet e forta nga tërmeti kanë frikësuar qytetarë të të gjitha moshave. Të trembur nga lëkundje të tjera shumë persona e kanë kaluar natën jashtë shtëpisë së tyre.

Edhe një çift i moshuar në Durrës kanë kaluar mbrëmjen jashtë.Çifti i moshuar ka treguar për News24 tmerrin e përjetuar nga tërmetet, teksa ka treguar se si ishin bllokuar në ashensor. Dy të moshuarit treguan se jetonin vetëm në banesë, kur një zhurmë e llahtarshme i ka goditur.

E strehuar në çadër e moshuara tha:

“Ishim dy pleq, tërmeti ishte shumë i madh. Ne donim të dilnim, nuk dolëm dot, ngelëm brenda në ashensor, pastaj u hap dera, kur mbaroi tërmeti. Por, shyqyr shpëtuam. Sot kishim lëkundje përsëri, ndaj u detyruam të vinim këtu. Mbrëmë qëndrua te stadiumi, në të ftohtë, deri në 2 të natës. Sa vajtën në shtëpi ra tërmeti sërish, dolëm dhe erdhëm të stadiumi”.

Pyetje: A keni përjetuar ndonjë tërmet të përmasave të tilla?

Para 30 vitesh. Ishte një zhurmë e llahtarshme dje. Frikë e tmerrshme, e paimagjinuar. Mezi dolëm nga ashensori.

Pyetje: Ku e morët informacionin për stadiumin? Nga televizori, që doli Rama e tha. Thamë më mirë të rrimë jashtë, sa të rrimë në shtëpi e të zbresim me vonesë. Në shtëpi nuk kishim dëme, vetëm qelqurina, por tronditja ishte shumë e madhe.

Pyetje: Natën sonte do e kaloni këtu? Nuk lëviz më, se jam e sëmurë, edhe e moshuar. Do rrimë këtu.