Njihni Yllkën, nxënësen që shet piktura për të blerë ilaçet e saj

Yllka është një vajzë e vogël, e cila ka ëndrra dhe dëshirat e saj, si çdo bashkëmoshatare. Ajo jeton dhe mëson në Prishtinë, por prej moshës së vogël është prekur nga një sëmundje e njohur si fibroza cistike.

Edhe pse trajtimi i saj kushton shumë dhe familja nuk është në gjendje të përballojë çdo shpenzim, vetë Yllka ka vendosur të ndihmojë prindërit. Ajo bën piktura shumë të bukura dhe më pas i shet.

Teknika që përdor e vogla është ajo me rrathë, një teknikë moderne dhe mjaft e pëlqyer kohët e fundit në Europë.

Siç tregohet në reportazhin e REL, Yllka shpjegon se terapia e saj kushton rreth 1 mijë euro, ndërsa e ëma, çdo para që ka fituar nga shitja e pikturave, e ka përdorur për terapinë e vogëlushes.

Nëna e saj thotë se kohët e fundit pikturat e Yllkës nuk po shiten si në fillim.

Ajo shprehet:

Në qoftë se ka të interesuar për të blerë piktura, Yllka mund ta sigurojë terapinë… Kostoja mujore e terapisë është shumë e lartë. Ajo kushton nga 1, 600 deri në 2,100 euro. Varet si e gjejmë, pasi në Kosovë nuk ka terapi të tillë. Ajo mund të sigurohet vetëm në Gjermani, Itali, Zvicër apo në Amerikë”.

Yllka ndjek mësimet në klasën e nëntë në Shkollën fillore “Dardania” në Prishtinë dhe është nxënëse e shkëlqyer.