Java e gjashtë e Serisë A, sjell derbin e madh të Italisë, Milan-Inter. Dy skuadrat nga qyteti i Milanos, do të përballen sonte në orën 20:45 mes tyre në derbin e parë të këtij sezoni.
Duke qenë se bëhet fjalë për një nga ndeshjet derbi më të mëdha në botë, të dyja skuadrat do përpiqen të jenë të pagabueshme dhe do kërkojnë me ç'do kusht fitoren. Ndërkaq, po ju njohim me disa statistika dhe fakte interesante rreth kësaj ndeshje:
– Ndeshja me më shumë gola e zhvilluar mes Interit dhe Milanit është ajo e 6 nëntorit 1949. Plot 11 gola të realizuar, me fitoren e Interit 6-5
– Ndeshja e parë zyrtare mes Milanit dhe Interit u luajt në kampionatin e vitit 1909, më saktësisht më 10 janar, kur në “Camp Milan” të Porta Monfortes kuqezinjtë fituan 3-2 falë golave të shënuar nga Trere II, Lana dhe Laich, ndërsa zikaltrit u përgjigjën me Gama dhe Schuler
– Por, ndeshja e parë e historisë (jo zyrtare) u zhvillua jashtë Italisë, në Locarno të Zvicrës. Shumë pak informacione ka për atë përballje, por dihet data (18 tetor 1908). U fitua nga Milani 1-0 me golin e Pierino Laria dhe u luajt me dy pjesë nga 25 minuta
– Goli më i shpejtë i Interit: Sandro Mazzola (13 sekonda, 24 shkurt 1963)
– Goli më i shpejtë i Milanit: Pato (43 sekonda, 2 prill 2011)
– Goli më i vonë i Interit: Adriano (90’+3, 11 dhjetor 2005)
– Goli më i vonë i Milanit: Zapata (90+7′, 15 prill 2017)
