Në një kohë që bota i ruan me fanatizëm pasuritë e veta natyrore ne kujdesemi që t’i shkelim me të dyja këmbët pa na u dridhur qerpiku e pa menduar fort për të ardhmen.
Rëndësi ka që të fitojmë ca para më tepër dhe jo e ardhmja e pasigurt që po u lëmë fëmijëve tanë.
Pavarësisht kundërshtimeve të banorëve, që ia dinë më mirë se kushdo vlerën këtij lumi, dhe të gjithë njerëzve të tjerë që iu dhimbset sadopak ky vend, Valbona vazhdon të betonizohet dhe uji i saj i kaltër vazhdon të turbullohet.
Ndërtimi i hidrocentraleve në Valbonë është kundërshtuar vazhdimisht, herë me protesta e herë me koncerte, nga banorët e zonës, aktivistë të mjedisit e dhjetëra artistë. Hidrocentralet mbi lumin e Valbonës po ndërtohen nga kompania “Gener2” e oligarkut Bashkim Ulaj, bazuar në kontratën koncesionare nënshkruar me Ministrinë e Energjisë në vitin 2009. Banorët shprehen se ndërtimi i qoftë edhe një HEC-i të vetëm, do të dëmtonte në mënyrë të pariparueshme Luginën e Valbonës dhe turizmin në këtë zonë.
Pikërisht për këtë ‘çnderim’ të Valbonës ka shkruar edhe eksperti i çështjeve mjedisore, Abdulla Diku në një postim në llogarinë e tij në Facebook.
Në shkrimin e tij, Diku thotë me të drejtë se Valbona po dënohet me vdekje "në emër të anti-vlerës, anti-shqiptarisë, kaosit dhe rrumpallës..”
Ambientalisti e krahason Valbonën me një vajzë e cila është e pastër si kristali por ‘barbarët tashmë po e çnderojnë duke i marrë pastërtinë dhe freskinë.’
Postimi i plotë:
Valbona, e gjunjëzuar para shkatërrimit!
VALBONA dënohet me vdekje…!
Na fal ti Valbonë e hijshme, e freskët, miliona vjeçare.
Shkatërrimi yt u bë me një firmë me bojë, hedhur nga njerëz të pa bojë, sharlatanë.
Të ruajtën nga pushtuesit por në fund të përdhunuan zullumqarët e kohës tonë, të paudhët që ju dhe jetë e bereqet.
Na fal Vabonë!
Tashmë do të të vajtojmë për jetë e mot, sepse të shpërfytyruan dhe ti nuk do jesh kurrë më ashtu siç të bëri i madhi ZOT.
Ti nuk do të jesh kurrë më Valbona e lirë, e freskët dhe natyrale. Se ti ishe edhe më e magjishme se vetë imagjinata jonë për ty. Orët e malit e humbën shtëpinë e tyre, përgjithmonë.
Ti nuk do jesh kurrë më Valbona e legjendave, e historisë, simboli i bukurisë, jetës dhe përjetsisë.
Tashmë urdhër-shkatërruesit sharlatanë do të të përdorin si prostitutën e semaforit – vetëm për të bërë lek për tutorët.
Na fal Valbonë!
Me ty do bëhen vetëm konkurse se kush të vajton më bukur, me të vetmin subjekt – hijeshinë që ta vranë. Se ti ishe Valbona që nuk je e nuk do jesh kurrë më!
Na fal Valbonë!
Të paktën do ngushëllohemi me faktin që nuk ka falje për barbarët, një ditë do ketë drejtësi. Shpresoj që herët a vonë të shohim ndëshkimin për plagët që i hapen shtatit tënd, për ujin-kristal që ta turbulluan e përjetsinë që ta vranë.
Zoti mos i faltë barbarët zullumqarë!
Ç'të them?! Zoti nuk i ka vënë kufinj të keqes, dhe e keqja ra mbi ty, ra mbi ne!
Do të doja që edhe varret e atyre që ta bënë këtë, e i gjithë sojit të tyre të mos e prekin tokën e planetit tonë, se edhe të vdekur e ndyjnë atë!
***
Për t’u bërë pjesë e grupit mjafton të klikoni: Join Group dhe kërkesa do t’ju aprovohet. KOMUNITETI JOQ ALBANIA: https://m.facebook.com/groups/komunitetiJOQ/
