Gjykata e Vlorës ka dhënë masën e sigurisë për pronarin e Bar Restorant "Panorama" në Porto Palermo, Mihal Kokëdhima.
Sipas vendimit të Gjykatës, 55-vjeçari është lënë në qeli pa afat.
Ai akuzohet për konsumimin e tre veprave penale: "Kanosje", "Shkatërrim i pronës" dhe "dëmtime të tjera me dashje".
Kokëdhima ka justifikuar veprimet e tij, duke u shprehur se nuk kishte si qëllim t'i dëmtonte turistët.
Ndër të tjera ai tha se e theu xhamin që të mbahej, ndërsa akuzoi dy shqiptarët që drejtonin furgonin se tentuan ta shtypnin.
Por dëshmia që ka dhënë përpara togave të zeza nuk e ka shpëtuar Kokëdhimën nga qelia.
Ai tha:
Nuk kam bërë asnjë gjë t'i dëmtoja ata. U mundova t'i ndaloja. Ata nisën makinën dhe desh më shtypën. Ju luta gjithë rrugës të ndalonin, por ata nuk ndaluan. Kur ndaluan zbrita nga makina dhe shkova vetë lajmërova policinë dhe shkova në polici. Më morën zvarrë me makinë. Ç'është kjo punë, nuk kam prekur njeri me dorë. Ku janë faktet që i preka me dorë? Më rrëzuan në Qeparo nga makina. Si ka mundësi, unë nuk e theva xhamin për t'i dëmtuar, por për tu mbajtur. Unë u mora targën, telefonaova policinë. Ata futën marshin të më shtypnin dhe unë u hodha në kroskot. Kam dy fëmijë në shkollë në Gjermani. Ne vetëm dy muaj punojmë. Më lini të punoj."