Gëzimi më i madh i prindërve janë fëmijët. I riu malajzian Muhamed Ismail, jo vetëm që doli me nota të shkëlqyera gjatë studimeve me bursë në Britani të Madhe, por bëri një gjest të rrallë për t’u siguruar prindërve biletat e shtrenjta nga Malajzia në Britani.
I riu kreu studimet në Universitetin e Essex duke marrë diplomë me nderime, por kjo nuk do t’i bënte përshtypje po qe se prindërit nuk do ta shoqëronin në ceremoni.
Kështu, ai kishte punuar pastrues për tre vite me një orar të reduktuar, duke studiuar për shumë orë, dhe duke punuar për pak orë, sa për të mbledhur mjaft para për biletat.
Familja e Muhamed Ismail i kishin parë me kohë aftësitë e mësim nxënies që i kishte i biri, dhe kishin bërë më të mirën për ta dërguar për studime në Angli.
Dhe mundi u pagua.
Pas rezultatit të mahnitshëm, ai pagoi vitin e parë dhe vitet e ardhshme i fitoi falas përmes bursës. Ai kurrë nuk i harroi prindërit që i la në shtëpi duke u kujdesur për të vëllanë me handikap.
Meqë i lejohej një sasi e caktuar e orëve të punës në javë, ai mori fshesën dhe leckën, duke pastruar aty ku i jepej mundësi.
Për të parë të birin e diplomuar me nderime të larta në Financë, prindërit e tij bënë fluturimin 14 orësh, për të qenë në momentin e lumtur të të birit.
Dhe me siguri, lumturia e tyre bie sa mbi modestinë dhe dashurinë që i biri ua shfaq, aq edhe në arritjen e tij profesionale.