Referuar denoncimeve të shumta, përgjimeve të publikuara, të faktuara edhe me video, është e ditur tashmë që administrata është në shërbim të qeverisë dhe duhet t’i bëjë “qokën”, që në këtë rast është besnikëria me votë, për të ruajtur vendin e punës.
Nisur nga mësuesit, punonjësit e bashkive e deri tek policia (rasti i denoncuar në artikullin e mëposhtëm), u është ushtruar presion nga eprorët për të votuar familjarisht në zgjedhje pasi pjesëmarrja paraqitet e ulët.
Në këto mesazhe kërcënuese që kryesisht diskutohen në grupet e punës në WhatsApp, si provë për “besnikërinë në votë” do të merret gishti i lyer me të zezë. Ndërsa në një tjetër nivel shkon propaganda e bashkisë për punonjësit e saj, të cilët janë të detyruar të postojnë edhe foto në rrjetet sociale për të treguar se kanë votuar dhe i urojnë suksese Veliajt.
Edhe policia nuk mund të mbeste jashtë kësaj vorbulle rilindase, ku Ermal Kapllani, shefi i Policisë Bashkiake detyron policinë të shkojë të marrë pjesë në zgjedhje pasi është urdhër nga kryetari e për pasojë të gjithëve do u kontrollohet gishti të hënën kur të paraqiten në punë.