Bashkia Kukës ka paditur dy anëtarët e KZAZ-së nr 11 të qytetit. Kryebashkiaku Bashkim Shehu, shprehet se këta persona po mbajnë të bllokuar në mënyrë të paligjshme mjediset e shkollës "Havzi Nela".
Sipas Shehut anëtarët e KZAZ-së po konsumojnë veprën penale të "Shpërdorimit të detyrës". Në argumentimin e tij, kreu i Bashkisë Kukës shprehet se edhe pse kanë marrë dijeni për anulimin e zgjedhjeve vendore, ata vazhdojnë të mbajnë të bllokuar KZAZ-në.
Më tej në padi thuhet se anëtarët e KZAZ-së, i lëvizën materialet zgjedhore nga mjediset e Qëndrës Kulturore "Hasan Prishtina", por vazhdojnë të mbajnë të bllokuar shkollën "Havzi Nela", në kundërshtim me ligjin.
Kujtojmë se në nenin 248 të Kodit Penal, thuhet se Kryerja ose moskryerja me dashje e veprimeve apo e mosveprimeve në kundërshtim me ligjin, që përbën mospërmbushje të rregullt të detyrës, nga personi që ushtron funksione publike dënohet me burgim deri në shtatë vjet dhe me gjobë nga treqind mijë deri në një milionë lekë.