Në dy raste, objektet e kultit në Shqipëri janë përdorur nga kandidatët e Partisë Socialiste si vende për të bërë fushatë.
Fillimisht ishte Tërmet Peçi ai që prezantoi brenda ambienteve të një kishe ortodokse, kandidatin në Lekël të Tepelenës.
Më pas, në një intervistë të publikuar në ERTV, kryetarja aktuale e bashkisë Rosokovec dhe njëkohësisht kandidatja e PS për këtë bashkia, Majlinda Bufi, ka folur për arritjet e saj brenda kishës së “Shën Kollit”.
Kundrejt këtyre rasteve ka reaguar Kisha Ortodokse, e cila i ka cilësuar këto veprime si të jashtëligjshme dhe fyese.
Në një njoftim për shtyp, kryepiskopata shkruan:
Ditët e fundit, në dy raste, në kuadrin e fushatës parazgjedhore, ka pasur përdorim të papranueshëm të mjediseve kishtare për qëllime politike. Në Kurjan të Roskovecit, në Mitropolinë e Fierit, është bërë një prezantim kandidati në mjediset e kishës monument kulture të Shën Nikollës dhe në fshatin Lekël të Tepelenës, në Mitropolinë e Gjirokastrës, ka pasur gjithashtu një takim politik parazgjedhor në mjediset e kishës së Profetit Ilia, të dyja pa dijeninë e Mitropolive përkatëse.
Përdorimi i ambienteve të brendshme të kishave të shenjta për aktivitetet politike në fushatat zgjedhore përbën një fyerje të ndjenjave fetare komunitare dhe institucionale. Çdo kishë orthodhokse, si objekt kulti i komunitetit orthodhoks, është vend i shenjtë adhurimi dhe lutjeje dhe nuk mund të përdoret në asnjë rast për qëllime politike.
Këto veprime janë në kundërshtim me “Marrëveshjen ndërmjet Këshillit të Ministrave të Republikës së Shqipërisë dhe Kishës Orthodhokse Autoqefale të Shqipërisë” (Ligji nr. 10 057, dt. 22.01.2009). Prandaj, kërkojmë që këto veprime të mos përsëriten dhe që për vendet e shenjta të tregohet respekti që imponon ligji dhe bashkëjetesa fetare."
