Gazeta prestigjoze gjermane “Bild”, e cilësuar si një nga gazetat më të mëdha të Europës, ka publikuar dhjetë përgjime të reja, për blerjen e votave në qarkun e Dibrës. Përgjimet janë pjesë e dosjes 184.
Një nga personazhet që figuron në këto përgjime, është Imer Lala, babai i deputetes Reme Lala. Ai bisedon me ish- ministrin e Brendshëm Saimir Tahirin, ish- ministrin e Infrastrukturës, Damian Gjiknuri dhe persona të tjerë, lidhur me procesin zgjedhor, marrjen e kartave të identitetit të votuesve dhe identifikimin e votave të tyre.
Bild e konsideron Imer Lalën, një “bos të mafias”.
Emri i Imer Lalës, është lakuar shpesh në media, veçanërisht nga eksponentë të opozitës dhe kryetari i saj, Lulzim Basha, i cili e ka quajtur atë “një kriminel”.
Imer Lala ndër të tjera përmend në biseda edhe me "bablokun e madh", që sipas “Bild” është kryeministri Edi Rama.